| S1048 | 7365.63 Index schepenprotocol Oss (7365.63) Samenvatting op bhic.nl: Voor Jan Dierck Bogaerts ende Thomas Marcelis Coolen ende Goert Claes Goertss, schepenen in Oss, hebben die eersaemen Jan Peeter Smits ende Willemken dochtere Willem Geris echte luijden woenende alhier in Oss, den voirs Jan cranckachtich ende die voirs Willemken gesont van lichaem, beijde haer vijff sinnen, memorie ende verstant volcomelijck machtich, hun testament gemaakt. Zij willen dat den lancxtlevende van henne beijden sal blijven besitten sijnen leefdaege lanck int generael alle de goederen soe meublen als immeublen die sijluijden nu hebben ende noch sullen moegen vercrijgen, ende dat den selven lancxtlevende des benoijt sijnde ende des van doen hebbende die macht hebben sal daervan te vercoopen tgeene hem soude moegen gelieven ende die cooppenninghen daer van procedeerende te emploijeeren naer sijnen wille ende goetduencken. Item willen sij dat naer haerlieder beijder doot Willemken haers testatrices nichte dochtere Jan Aertss van Uden tegenwoirdighe huijsvrouwe van Jan Peeterssen in eijgendom hebben sal het huijs mette schuere ende den hoff lants daer sij luijden testateuren tegenwoirdich woenende sijn gelegen tot Oss ter plaetschen genoemt heijtweijck, groot omtrent 4 vaetsat lants, sijnde vanden ouders haers testatrices gecomen, ende daerbij alnoch den hoff lants daer beneffens gelegen genoemt quicken hoff groot omtrent 2 vaetsaet, den welcken hoff die testateuren staende hennen houwelijcke tsaemen gecocht hebben; ende daerbij alnoch een buesken oock gelegen tot Oss aende brant ter plaetschen genoemt den elscamp, doch des met alsulcke conditie, indien die voirs Willemken haer testatrices nichte quaeme te sterven sonder kijnderen achter te laeten dat alsdan het voirs huijs mette schuere ende twee hoffenen lants ende buesken eijgendommelijck aencomen ende succedeeren sullen aenden gheenen die tsaementelijcke bij beijde henne testateuren hiernae in desen henne testamente geinstitueert wordden henne erffgenaemen, te weeten aen Lijsken die moeder des voirs Willemkens oft in cas van haere afflijvicheijt aen haere andere kijnderen. Item maeckt die voirscreven testateur dat sijne naeste vrienden te weeten Jan Jaspars woenende alhier tot Oss, Goossen Jans Smits woenende tot Deemen, Gerit Jans Smits woenende tot Lithoijen, Hilleken Jans Smits woenende tot Geemert ende Stijntgen Jans Smits woenende oock alhier tot Oss, deese voirs 5 persoonen naede doot van beijde hen testateuren als voir tsaemen hebben sullen de somme van 500 guldens, de welcke somme van 500 guldens onder hun luijden hooft voir hooft met gelijcke portien sal wordden gedeijlt, alsoe dat elck van hunlieden daeraff sall hebben ende prouffiteeren de somme van 100 gulden, ende indien iemant vande voirs 5 persoonen voirden lancxtlevenden van beijde hen testateuren quaeme te sterven, soe sullen desselffs kijnderen dient halven henne overledene vader ofte moeder representeeren. Ende wilt hij testateur dat de voirs 5 persoonen oft haere kijnderen daermede sullen blijven ende vuijtstaen vuijt alle sijne goederen tsij hem aenverstorven van sijne ouders off hem in sijn leven bij coope oft andersints vercregen ende noch te vercrijgen. Item maeckt die voirs testatrice dat naer doot van beijde hen testateuren als voir Lijsken haere nichte dochtere wijlen Claes Willem Geriss hebben sal de somme van 10 gulden eens, ende daermede blijven ende vuijtstaen sal vuijt allen haers testatrices goederen. Willen voirts sij testateuren tsaementelijck dat alle henne resteerende goederen die sij luijden op deser werelt achter laeten sullen naer doot van hun beijden als voir volcomelijck in eijgendom aencomen ende succedeeren aen Lijsken dochtere wijlen Jans Willem Geris des voirs testatrices nichte sijnde tegenwoirdich wettige huijsvrouwe van Jan Aertss van uden woende tot Heesch, ende indien de selve Lijsken dochtere wijlen Jans Willem Gerissen voirden lancxtlevenden van beijde hen testateuren quaeme te sterven soe sullen desselffs kijnderen dienthalven in haere plaetsche staen, instituerende sij testateuren tsaementlijck die selve Lijsken dochtere Jans Willem Geris oft inden voirs cas haere achtergelaeten kijnderen haerlieden wettige ende gerechtelijcke erffgenaemen. Actum 3-11-1623, testes ut supra. |